យុទ្ធសាស្រ្តដឹកនាំខ្លួន ឲ្យក្លាយជាមនុស្សពូកែរបស់ សុក ស៊ីផាន់ណា

មនុស្សគ្រប់រូបកើតមក សុទ្ធតែមានចំណុចពិសេសរៀងៗខ្លួន ហើយចំណុចពិសេសទាំងនោះសុទ្ធតែអាចអភិវឌ្ឍបាន។ តួយ៉ាងដូចរូប ឯកឧត្តមសុក ស៊ីផាន់ណា ផ្ទាល់ តាំងពីតូចរហូតដល់វ័យនេះ លោកបានអភិវឌ្ឍនូវចំណុចពិសេសជាច្រើនក្នុងជីវិតលោក។ ប្រហែលលោកអ្នកខ្លះមិនទាន់បានដឹងទេថា លោកបានរៀនបរិញ្ញាបត្រត្រឹមតែ ២ឆ្នាំកន្លះប៉ុណ្ណោះ កាលគាត់រៀននៅអាមេរិក។

នៅក្នុងបទសម្ភាសន៍ជាមួយទស្សនាវដ្តីពាណិជ្ជកម្មកម្ពុជា ដែលបានចេញផ្សាយកាលពីខែ ឧសភា កន្លងទៅនេះ ឯកឧត្តមសុក ស៊ីផាន់ណា បានធ្វើការបកស្រាយនូវ យុទ្ធសាស្រ្តមួយចំនួន ដែលអាចនាំលោកឲ្យក្លាយជាមនុស្សពូកែម្នាក ដោយជោគជ័យ។

ទី១ ត្រូវមានទម្លាប់គិត ២ ឬ៣ ក្នុងពេលតែមួយ

លោកបានពន្យល់ជាច្រើននៅក្នុងទស្សនាវដ្តីពាណិជ្ជកម្ម កម្ពុជាលេខ ២១នោះ តែលោកបានផ្តោតជាសំខាន់ ថាចង់ជោគជ័យនៅក្នុងសម័យបច្ចេកវិទ្យា ត្រូវរៀនគិត ២ ឬ៣ ក្នុងពេលតែមួយ។ លោកបានលើកឧទាហរណ៍ថា ពេលលោកកំពុងជិះឡាន លោកអាចស្តាប់វិទ្យុបាន ហើយពេលមើលទូរទស្សន៍ លោកក៏អាចហាត់ប្រាណ ព្រោះលោកយល់ឃើញថា ពេលប្រើខួរក្បាល ដៃជើងយើងនៅទំនេរ ចុះហេតុអ្វីយើងមិនធ្វើអ្វីដែលមានប្រយោជន៍បន្ថែម?

ទី២ ជីវិតគឺជាការរៀនសូត្រ

គួរបញ្ជាក់ថា ទោះស្ថិតនៅក្នុងរបបខ្មែរក្រហមក៏ដោយ ក៏លោកឆ្លៀតរៀនបានដែរ។ លោក សុក ស៊ីផាន់ណា បានប្រាប់ថា កាលនោះលោកបានលាក់សៀវភៅ ៤ ក្បាល ហើយលោកឆ្លៀតអានដោយហែកមួយសន្លឹកម្តងៗ ដោយខ្ចប់អាហារ ឬរបស់ផ្សេងៗ។ សៀវភៅទាំងនោះហើយ ដែលបានធ្វើឲ្យលោកអាចរៀនទាន់គេនៅអាមេរិកបាន ក្រោយរបបខ្មែរក្រហម។ សព្វថ្ងៃក៏លោកនៅតែបន្តរៀនដែរ ទាំងភាសានិងចំណេះដឹងផ្សេងៗទៀត។ លោកថា ការរៀនមិនមានថ្ងៃឈប់នោះទេ បើដល់ថ្ងៃដែលយើងឈប់គឺមានតែដល់ថ្ងៃដែលយើងស្លាប់។

ទី៣ ធ្វើឲ្យអស់សមត្ថភាព ចាញ់ ឬឈ្នះកុំខ្វល់

នៅក្នុងជីវិត កុំគិតរឿងឈ្នះឬចាញ់ ព្រោះយើងធ្វើអ្វីមួយ មិនមែនត្រឹមត្រូវរហូតនោះទេ។ លោកបានប្រៀបធៀបនឹងការងាររបស់មេធាវីដែរ ដែលថាការការពារកូនក្តីមិនអាចឈ្នះរហូតនោះទេ។ ដូចនេះអ្វីដែលសំខាន់ គឺត្រូវផ្តោតលើអ្វីដែលយើងត្រូវធ្វើ ហើយត្រូវធ្វើវាឲ្យអស់លទ្ធភាព៕